إعلان سكن لكل المصريين (9) تسعة وإعلان بيت العمر – إزاي أختار؟

مع طرح إعلاني “سكن لكل المصريين (9)” الإيجار المدعوم و“بيت العمر” الإيجار التمليكي، ينشر مرصد العمران تقريره عن مزايا وعيوب الإعلانين لفئة محدودي الدخل: الأسر التي يتراوح صافي دخلها الشهري ما بين 5000 إلى 16,000 جنيه.

فيه 3 كراسات، إزاي أختار؟

طرحت وزارة الإسكان إعلانين: واحد لمنخفضي الدخل (الإيجار المدعوم)، وواحد لكل المواطنين (الإيجار التمليكي) به كراستين. كل كراسة فيها شرائح دخل مختلفة وتتيح الوحدات في محافظات مختلفة حسب الجدول التالي:

طب وإيه المحافظات المطروحة في كل كراسة؟

الكراسات الثلاثة بتغطي 22 محافظة في مصر، الكراسة 1 (برنامج الإيجار المدعوم) فيها 22 محافظة، والكراسة 2 (الإيجار التمليكي لوحدات جاهزة) بتغطي 18 محافظة، والكراسة 3 (الإيجار التمليكي لوحدات تسليم 36 شهر) بتغطي 8 محافظات، حسب الجدول التالي. غير متاح وحدات للإيجار المدعوم في 5 محافظات وهي بور سعيد وشمال سيناء وجنوب سيناء والوادي الجديد والبحر الأحمر. في كراسة الإيجار التمليكي (جاهز)، مافيش وحدات في 9 محافظات وهي الغربية وكفر الشيخ والإسماعيلية والسويس وبورسعيد وشمال سيناء وجنوب سيناء والوادي الجديد والبحر الأحمر، لكن متاح التقديم ببعض المحافظات المجاورة لها. وفي كراسة الإيجارالتمليكي (36 شهر)، مافيش وحدات في 19 محافظة لكن مسموح لهم يقدموا في محافظات مجاورة باستثناء 3 محافظات مايقدروش يقدموا خالص في الكراسة دي وهي البحيرة وأسيوط والوادي الجديد.

ملخص الكراسة 1 – برنامج الإيجار المدعوم

لمزيد من التفاصيل، راجع مقال إعلان سكن لكل المصريين (9) – مزايا وعيوب

أولًا: الشروط الخاصة بالكراسة 

وحدات الكراسة دي متاحة للأسر فقط سواء يكون مقدم الطلب متزوج يعول أو لا يعول، أرمل/ة ويعول، مطلق/ة ويعول، وعمره ما يقلش عن 21 وما يزيدش عن 35 سنة. الوحدات متاحة لمنخفضي الدخل فقط من العاملين بالقطاعين الخاص والحكومي/العام. بحيث إن الأسر اللي هتقدم في محافظات يكون صافي دخلها الشهري بين 5 آلاف و16 ألف جنيه، والأسر اللي هتقدم في المدن الجديدة يكون صافي دخلها الشهري بين 8 آلاف و16 ألف جنيه. وكمان الأسر اللي هتقدم من المدن الجديدة لازم يكون محل الإقامة ومحل العمل لصاحب الطلب أو الزوج / الزوجة بنفس المدينة الجديدة المتقدم عليها. والأولوية في تخصيص الوحدات لعملاء الإيجار القديم اللي سبق وقدموا على منصة مصر الرقمية.

ثانيًا: المواقع والأسعار والمساحات

وحدات الكراسة متاحة في 22 محافظة، في مدن قائمة ومدن جديدة، جاهزة للتسليم، بأسعار إيجار تتراوح من 3,000 جنيه لحد 5,250 جنيه في المدن الجديدة، ومن 1500 جنيه لحد 3,675 في المحافظات، وهتزيد 7% سنويًا. المستأجر هيدفع بالكتير 25% من دخله إيجار، والصندوق هيتحمل الباقي كدعم نقدي بحد أقصى 100 ألف جنيه على مدار سنوات الإيجار. (ملحق1)

ثالثًا: أعباء التقديم والإيجار

عند التقديم مطلوب 365 جنيه مصروفات تسجيل لا تُرد، و10 آلاف جنيه تأمين. ولما الملف بيتقبل بيكون مطلوب من المستأجر شهر إيجار مقدم، ومصروفات الصيانـة والإدارة والتحصيـل 250 جنيه، ورسوم تحصيل هتحددها جهة التحصيل (الشركة/البنك). بالإضافة لرسوم توثيق عقد الإيجار في الشهر العقاري وتذييله بالصيغة التنفيذية.

ملخص الكراسة 2 – الإيجار التمليكي (جاهزة)

أولًا: الشروط الخاصة بالكراسة

وحدات الكراسة دي متاحة لـ 3 شرائح دخل (شهري).

الشريحة الأولى: من 5 آلاف لـ 12 ألف للأعزب، ومن 5 آلاف لـ 16 ألف للأسرة.

الشريحة الثانية: من 12,001 لـ 21 ألف للأعزب، ومن 16,001 لـ 28 ألف للأسرة.

الشريحة الثالثة: من 21,001 لـ 33 ألف للأعزب، ومن 28,001 لـ 44 ألف للأسرة.

ثانيًا: المواقع والأسعار والمساحات

وحدات الكراسة دي متاحة في 18 محافظة، كلها في مدن جديدة فقط، جاهزة للتسليم بأسعار إيجار تتراوح بين 2,534 جنيه و5,441 جنيه لشريحة الدخل الأولى، أو تتراوح بين 3,525 جنيه و11,572 جنيه لشريحة الدخل الثانية، أو تتراوح بين 9,005 جنيه و16,231 جنيه لشريحة الدخل الثالثة. أسعار الإيجار دي للسنة الأولى وبتزيد 10% سنويًا. وهنركز في شرحنا للكراسة على شريحة الدخل الأولى فقط (فئة منخفضي الدخل).

الوحدات المتاحة لشريحة الدخل الأولى موجودة في 15 محافظة فقط مع السماح لأهالي 5 محافظات وهي السويس والإسماعيلية والغربية والبحر الأحمر والوادي الجديدة إنهم يقدموا بالمحافظات المجاورة لهم. أغلب الوحدات مساحتها 57 م2 و63 م2، وإيجارها الشهري يتراوح بين 2,534 جنيه و5,441 جنيه غير شامل تكلفة الصيانة.(ملحق2)

ثالثًا: أعباء التقديم والإيجار لشريحة الدخل الأولى

عند التقديم مطلوب 500 جنيه رسوم تسجيل لا تُرد، وجدية حجز 5 آلاف أو 10 آلاف حسب المشروع.

لما الملف بيتقبل بيكون مطلوب مصاريف التعاقد، واستكمال جدية الحجز عشان يغطي تأمين 3 شهور إيجار وبيتم تحديث قيمة التأمين سنويًا مع الزيادة في الإيجار، وشهر إيجار مقدم عند الاستلام، وسداد تكلفة تركيب العدادات، بالإضافة لمصاريف الصيانة اللي بتتدفع بطريقتين: الأولى كل شهر مع الإيجار مع العلم إنه لما تيجي تتملك الوحدة بشكل نهائي بيكون مطلوب وقتها تدفع وديعة صيانة، أو الطريقة التانية إن مصاريف الصيانة تتدفع مرة واحدة كوديعة 8% من سعر الوحدة وفي الحالة دي بتدفع كمان عند التعاقد 1% من سعر الوحدة لحد ما الوديعة تحقق عائد وفي نهاية السنة بتعمل تسوية.

ملحق1: بيانات وحدات الإيجار المدعوم وقيمة الإيجار (جنيه/شهر) للعام الأول

ملحق2: بيانات وحدات الإيجار التمليكي المنفذة المتاحة لشريحة الدخل الأولى وقيمة الإيجار (جنيه/شهر) للعام الأول